Matapos ang pagtakas ng dating Bamban mayor na si Alice Guo, unang natanggal sa pwesto si Immigration Commissioner Norman Tansingco.
Nangako si Pangulong Marcos na “may mga ulo na gugulong” matapos makalabas ng bansa si Guo.
Kinumpirma ni Secretary Cesar Chavez ng Presidential Communications Office na inaprubahan na ng Pangulo ang pagkatanggal kay Tansingco.
Ayon kay Justice Secretary Jesus Crispin Remulla, tinanggap ni Marcos ang kanyang rekomendasyon na sibakin si Tansingco.
“Oo, nagkasundo kami ng Pangulo… papalitan siya (Tansingco),” ani Remulla, at ipinaliwanag na ang rekomendasyon ay dahil sa ilang isyu, kabilang na ang pagtakas ni Guo kahit siya’y nasa immigration lookout bulletin.
“Hindi ako kuntento. Marami kaming naging problema,” dagdag ni Remulla. Isa na rito ang kawalan ng aksyon ni Tansingco sa isyu ng mga pekeng kumpanyang nag-iisyu ng working visas, na nagpapahintulot sa hindi kanais-nais na dayuhan na pumasok sa bansa.
“Tinawag ko na ang pansin niya, pero wala siyang ginawa,” ani Remulla. Sinabi rin niya na nawalan na siya ng tiwala kay Tansingco dahil hindi agad siya ininform tungkol sa pagtakas ni Guo.
Parehong hindi nagbigay ng konkretong detalye ang Malacañang at Remulla kung direktang may kinalaman si Tansingco sa pagtakas ni Guo. Noong nakaraang buwan, nagbabala si Marcos na “may mga ulo na gugulong” kung mapapatunayang may mga opisyal na tumulong sa pagtakas ni Guo.
Si Guo ay nahuli ng mga awtoridad ng Indonesia sa Cendana Parc Residences sa Tangerang City noong Setyembre 4 at ibinalik sa Pilipinas noong Biyernes.