Pumanaw na ang tanyag na composer na si Lalo Schifrin sa edad na 93, ayon sa ulat ng US media ngayong Huwebes.
Si Schifrin ang nasa likod ng iconic na “Mission: Impossible” theme, pati na rin ng maraming sikat na musical scores sa Hollywood gaya ng Bullitt, Dirty Harry, Cool Hand Luke, at The Cincinnati Kid — mga pelikulang tumatak sa iba’t ibang henerasyon.
Tubong Buenos Aires, Argentina, si Schifrin ay may malalim na classical training, pero pinagsama ito sa jazz at modernong tunog — kaya’t naging kakaiba at makabago ang kanyang mga obra sa halos 100 pelikula. Ang kanyang anak na si Ryan Schifrin ang nagkumpirma ng balita sa mga entertainment outlets.
Bukod sa pagiging composer, si Schifrin ay isang international orchestra conductor at jazz pianist. Kilala siya sa kanyang silver na buhok, salamin, at eleganteng presensiya sa entablado.
Bilang anak ng concert master ng Philharmonic Orchestra sa Argentina, maaga pa lang ay sanay na siya sa piano. Pero nang ma-expose siya sa jazz at musika nina Charlie Parker at Louis Armstrong, tuluyan siyang nahulog sa musika ng Amerika — at dito nagsimula ang kanyang legacy.