Nagkakaroon ng legal at pampulitikang balakid sa posibleng pansamantalang pagpapalaya kay dating Pangulong Rodrigo Duterte mula sa International Criminal Court (ICC) — at mismong gobyerno ng Pilipinas ang sagabal.
Ang problema? Noon pa man, iginiit ng kampo ni Duterte na walang hurisdiksyon ang ICC sa Pilipinas, pero ngayon, ang parehong argumento ang pumipigil sa posibleng pag-apela niya para sa release.
Ayon kay ICC spokesperson Fadi El Abdallah sa panayam ng GMA, kailangang makipagtulungan ang gobyerno ng Pilipinas at tanggapin ang mga teknikal na proseso ng ICC para makonsidera ang anumang petisyon ng dating pangulo. Ngunit dahil mismo kay Duterte ang nagdesisyong umalis sa ICC noong siya pa ang nasa puwesto, tila tinik ito sa kanyang sariling kampo.
Ipinunto ni Palace Press Officer Claire Castro ang dilemang kinakaharap ng gobyerno:
“Kung hihiling tayo ng tulong sa ICC, ibig bang sabihin nito ay kinikilala natin ang kanilang hurisdiksyon? Samantalang dati, ipinaglalaban mismo ng pamilya ni Duterte na huwag makipagtulungan ang gobyerno sa ICC.”
Dagdag pa niya, kung sakaling mag-utos ang ICC na i-freeze ang assets ni Duterte, nais ba rin ng kanyang pamilya na sumunod ang gobyerno?
Sa ngayon, mariin ang posisyon ng Malacañang: “Hindi natin kinikilala ang hurisdiksyon ng ICC sa Pilipinas, kaya hindi natin ito dapat bigyan ng pansin.”
Duterte ay nahaharap sa kasong crimes against humanity kaugnay ng kanyang madugong drug war, na may naitalang mahigit 6,000 patay, bagamat sinasabi ng mga human rights groups na posibleng umabot ito sa 30,000.
Sa ilalim ng administrasyong Marcos, aminado ang gobyerno na mahirap ang imbestigasyon sa mga extrajudicial killings noong drug war, kung saan apat lamang ang naitalang convictions kaugnay nito hanggang 2024.