Pinayagan ng International Criminal Court (ICC) na ituloy ang pre-trial proceedings laban kay dating Pangulong Rodrigo Duterte matapos ideklarang siya ay “fit” o may kakayahang lumahok sa proseso.
Sa 25-pahinang desisyon, ibinasura ng ICC Pre-Trial Chamber I ang hiling ng depensa na ipagpaliban nang walang hanggan ang pagdinig dahil umano sa cognitive impairment ni Duterte. Ayon sa mga hukom, kapani-paniwala at malinaw ang resulta ng pagsusuri ng isang independent panel of medical experts na nagsabing nauunawaan ni Duterte ang mga kaso laban sa kanya at kaya niyang ipagtanggol ang kanyang mga karapatan.
Nilinaw ng korte na bagama’t may ilang tulong na ipatutupad alinsunod sa payo ng mga doktor, sapat ang kakayahan ni Duterte para makilahok nang makabuluhan sa pre-trial.
Itinakda ng ICC ang confirmation of charges hearing sa Pebrero 23. Una itong nakatakdang ganapin noong Setyembre ngunit naantala dahil sa kahilingan ng depensa. Tinanggihan din ng mga hukom ang alegasyon ng depensa na magkakasalungat ang findings ng mga medical experts, at iginiit na ang kabuuang pagsusuri ang dapat isaalang-alang.