Tinawag ni Bryan Adams na “the best night we ever had” ang kanyang konsiyerto sa Maynila matapos ang isang punô, masigla at emosyonal na gabi kasama ang Filipino fans sa SM Mall of Asia Arena noong Sabado, bilang bahagi ng kanyang “Roll With the Punches Tour Live,” na inihandog ng Wilbros Live.

Sa halip na karaniwang grand entrance, sinorpresa ni Bryan ang audience nang magsimula siyang kumanta mula sa isang maliit na platform malapit sa crowd. Binuksan niya ang show gamit ang mga klasikong Can’t Stop This Thing We Started at Straight from the Heart, bago lumipat sa main stage para sa sunod-sunod na paboritong kanta tulad ng Run to You, Somebody, at Kick Ass.

Mas lalong naging bongga ang gabi sa mga higanteng props tulad ng inflatable boxing glove at vintage car, habang pinasaya niya ang fans sa mahigit 20 kanta, kabilang ang mga paboritong pang-karaoke na Please Forgive Me at (Everything I Do) I Do It for You. Nagningning din ang arena sa pulang at asul na ilaw mula sa wristbands ng audience.

Pinatawa at pinatayo ni Bryan ang lahat sa You Belong to Me, hinikayat ang fans na sumayaw—o mag-“twerk,” biro niya—habang ang iba’y nagwagayway pa ng bandila ng Canada. Sa mas emosyonal na bahagi ng gabi, kinilig ang crowd nang baguhin niya ang linya ng Have You Ever Really Loved a Woman? sa “Have you ever loved a Filipino woman?”

Nagtapos ang konsiyerto sa mga awiting Summer of ’69, Cuts Like a Knife, at isang stripped-down na All for Love, bago muling pasalamatan ni Bryan ang mga Pinoy. Ayon sa kanya, matagal na nilang inaabangan ang pagbabalik sa Pilipinas—at ang gabing iyon ay tunay na hindi nila malilimutan.

Pinatunayan ng Filipina singer na si Arabelle Dela Cruz ang galing ng Pinoy sa international stage matapos niyang masungkit ang grand champion title sa kauna-unahang international edition ng South Korean singing show na “Veiled Cup.”

Tinalo ni Arabelle ang mga kalahok mula sa siyam na bansa, kabilang na ang kapwa niya Sparkle artists na sina Garrett Bolden at Thea Astley. Inanunsyo ng Sparkle ang kanyang panalo sa Instagram noong Pebrero 1.

Sa kompetisyon, nakilala si Arabelle bilang “Laguna Diva,” alinsunod sa format ng palabas kung saan umaawit ang mga contestant nakatago sa likod ng belo at kinikilala lamang sa kanilang palayaw at probinsya.

Si Arabelle ay runner-up ng “The Clash 2025,” at sa kanyang tagumpay sa Veiled Cup, muling ipinakita ng Filipina diva na kayang makipagsabayan—at manaig—ng talento ng Pilipinas sa mundo.

Sinimulan na ng US Justice Department ang paglalabas ng matagal nang hinihintay na mga dokumento kaugnay ng kaso ng convicted sex offender na si Jeffrey Epstein, ngunit agad itong sinalubong ng batikos dahil sa malawakang pag-redact o pagtatakip ng mahahalagang detalye.
Kabilang sa mga inilabas na files ang mga litrato na nag-uugnay kay Epstein sa ilang kilalang personalidad, gaya nina dating US President Bill Clinton, rock legend Mick Jagger, at pop icon Michael Jackson. Gayunman, maraming pahina ang halos puro itim dahil sa censorship, dahilan para lalo pang umigting ang hinala ng publiko sa posibleng cover-up ng mga makapangyarihang sangkot.

Sa isang dokumento, pitong pahina na naglalaman ng listahan ng 254 na masseuse ang tuluyang tinakpan ang lahat ng pangalan, ayon sa DOJ ay para protektahan ang posibleng mga biktima. Mayroon ding mga larawang nagpapakita ng mga hubad o bahagyang hubad na indibidwal, pati mga kuha ni Epstein at ng kanyang mga kasama na may hawak na baril—ngunit halos lahat ay may tinakpang mukha.

Kasama rin sa mga dating hindi pa nakikitang larawan si Ghislaine Maxwell kasama ang disgrasyadong si dating Prince Andrew, at isang litrato ni Clinton na nasa hot tub, na bahagi rin ay naka-redact.