Sa isang ambush interview nitong Miyerkules, inilabas ni Senador Risa Hontiveros ang posibilidad na ang mga indibidwal sa likod ng skandalong Pharmally ay kasangkot din sa mga pinagmulan ng operasyon ng illegal na Philippine offshore gaming operators (Pogos) sa bansa.
Ayon kay Hontiveros, hindi bago ang koneksyon ng Pharmally scandal sa kasalukuyang imbestigasyon sa Pogos.
“Pero mukhang Pharmally group ito, same cast of characters. Kaya mahalagang we get to the root of it, dahil mukhang itong grupong ito, itong Pharmally group, ay posibleng nandun nga sa roots ng problema natin sa Pogo,” pahayag ni Hontiveros.
Ang pahayag na ito ay ginawa ni Hontiveros matapos niyang ibunyag sa isang public hearing na si Gerald Cruz ng Brickhartz Technologies Inc. — kung kanino nahanap ang mga dokumento sa Bamban Pogo hub — ay konektado sa Pharmally Biological Company Inc., na kapatid na kumpanya ng kontrobersiyal na Pharmally Pharmaceutical Corporation na sangkot sa iskandalo ng sobrang-presyong medical supplies sa pamahalaan noong panahon ng Covid-19 pandemic.
“Pero wait, there’s more — si Mr. Cruz ay kasangkot din sa Full Win Incorporation. Kung pamilyar ang pangalan sa pandinig niyo, ito’y dahil ang presidente nitong Full Win ay si Michael Yang,” dagdag ni Hontiveros.
Si Yang ay dating adviser ni dating Pangulong Rodrigo Duterte at isa sa mga sentrong personalidad sa Pharmally scandal.
“Sa katunayan, ang Xion Wei Technologies Inc. na sinasabing pag-aari ni Mr. Yang ay pangalan ng email address ng Brickhartz. Sounds familiar? Earlier sa Bamban investigation natin may magkakaparehong email addresses,” ani Hontiveros.