Tinanggihan ng Pasig Regional Trial Court Branch 159 ang kahilingan ng nakakulong na lider ng Kingdom of Jesus Christ na si Apollo Quiboloy na mailipat sa “hospital arrest.” Ayon sa utos ng korte na isinapubliko kahapon, walang sapat na batayan para payagan siyang manatili sa Philippine Heart Center o The Medical City. Giit ng hukom, malinaw sa mga rekord na maayos na natutugunan ang mga pangangailangang medikal ni Quiboloy habang nasa kustodiya ng Pasig City Jail, at patuloy siyang nabibigyan ng tamang pangangalagang medikal sa ilalim ng mga bihasang doktor.
Ipinahayag ng panig ni Quiboloy na nakararanas umano siya ng hirap sa paghinga, lagnat, pananakit ng kalamnan, at ubo, ngunit nilinaw ng korte na ang mga sintomas na ito ay matagal nang nalapatan ng lunas batay sa ulat ng ospital noong Setyembre. Maging noong nakaraang taon ay ibinasura rin ng parehong hukuman ang kaparehong mosyon ng kampo ni Quiboloy.
Sa kasalukuyan, ang 75-anyos na televangelist ay nahaharap sa mga kasong may kinalaman sa qualified human trafficking, pang-aabuso sa kababaihan at menor de edad. Bukod dito, may mga kaso rin siyang kinakaharap sa Estados Unidos gaya ng sex trafficking, sabwatan, at pandaraya sa imigrasyon. Noong Agosto, sinabi ni Ambassador Jose Manuel Romualdez na humiling umano ang Washington ng extradition para kay Quiboloy, ngunit nilinaw ng Department of Justice at Department of Foreign Affairs na wala pang opisyal na kahilingang natatanggap mula sa Amerika.