Matapos ang star-studded premiere ng kanilang reunion film na “Hello, Love, Again,” spotted sina Kathryn Bernardo at Alden Richards na nagyakapan, na lalong nagpa-excite sa fans.
Ang sequel ng kanilang 2019 hit na “Hello, Love, Goodbye” ay handang pumutok sa takilya sa pagbubukas nito sa 500 sinehan nationwide, na may exclusive midnight screenings sa 72 piling mga sinehan, ayon sa Cinema Exhibitors Association of the Philippines (CEAP).
Bukod dito, ang pelikula ay napili bilang closing film sa Asian World Film Festival (AWFF) sa Los Angeles, California, na tatagal hanggang Nobyembre 20.
Ang “Hello, Love, Again” ay magpapatuloy sa kwento nina Joy (Kathryn) at Ethan (Alden) limang taon matapos ang una nilang pagtatagpo bilang OFWs sa Hong Kong. Sa bagong kabanatang ito, makikita ang pagsubok ng kanilang relasyon habang tinutupad ni Joy ang kanyang mga pangarap sa Canada.
Sa premiere night sa Megamall, nagbigay ng pasasalamat sina Kathryn at Alden sa kanilang mga fans, mga mahal sa buhay, at mentors.
“Narito na ulit ang kwento nina Joy at Ethan. Sana ay magustuhan n’yo ang pelikula at muling ma-in love sa mga karakter,” ani Alden.
Dagdag pa niya, “Sana ma-inspire kayong patuloy na gumawa ng mabuti sa mga tao sa paligid n’yo.”
Si Kathryn naman, labis ang pasasalamat sa walang patid na suporta ng fans. “Sobra kaming overwhelmed sa support n’yo. Ang maipapangako namin sa inyo, puso ang ibinigay namin sa pelikulang ‘to. Sana, maramdaman n’yo ‘yun matapos n’yong panoorin.”