Patuloy ang pag-angat ni Alex Eala matapos maitala ang bagong career-high na No. 31 sa Women’s Tennis Association (WTA) rankings.
Umakyat ng 16 puwesto ang 20-anyos na Pinay mula No. 47 matapos umabot sa quarterfinals ng WTA1000 Dubai Duty Free Tennis Championships—isa sa pinakamataas na antas ng torneo sa women’s tennis. Bago ito, bumaba siya sa No. 40 kasunod ng maagang exit sa Qatar Open, ngunit agad bumawi sa Dubai sa pamamagitan ng panalo kontra mas matataas na ranggong kalaban.
Kabilang sa mga tinalo niya ang world No. 8 na si Jasmine Paolini ng Italy, pati sina Hailey Baptiste ng US at Sorana Cirstea ng Romania. Natapos ang kampanya ni Eala sa quarterfinals matapos matalo kay world No. 4 Coco Gauff ng US.
Dahil sa kanyang pag-angat, nasa No. 5 na rin si Eala sa hanay ng mga manlalaro sa Asya, kasunod nina Elena Rybakina, Naomi Osaka, Zheng Qinwen at Wang Xinyu.
Mainit ang simula ng kanyang 2026 season, na may semifinal finish sa ASB Classic sa Auckland, quarterfinals sa Philippine Women’s Open, at solidong kampanya sa Abu Dhabi Open. Susunod niyang haharapin ang dalawang 1000-level tournaments—ang Indian Wells at Miami Open sa Marso.
Dahil sa sunod-sunod na tagumpay, patuloy na nakakahatak ng malaking suporta at papuri si Eala mula sa kapwa manlalaro at tennis fans sa buong mundo, patunay ng kanyang mabilis na paglapit sa hanay ng mga elite sa international tennis.