Dalawang Israeli hostage ang pinalaya ng Hamas nitong Sabado bilang bahagi ng ikaapat na palitan sa ilalim ng ceasefire deal, kasabay ng inaasahang pagpapalaya ng Israel sa 183 Palestinian prisoners.
Kinilala ang mga pinalayang bihag na sina Ofer Kalderon at Yarden Bibas, na unang ipinakita sa entablado bago itinurn-over sa Red Cross sa Khan Yunis, Gaza. Samantala, nakatakdang palayain si Keith Siegel sa isang katulad na seremonya sa Gaza City. Kinumpirma ng Israeli military na nakabalik na sina Bibas at Kalderon sa kanilang teritoryo.
Mula Enero 19, unti-unting nagpalaya ang Hamas at Islamic Jihad ng 18 hostages bilang kapalit ng daan-daang Palestinian detainees, karamihan ay kababaihan at menor de edad.
Nasaan ang Bibas Babies?
Isa sa pinakahinintay na hostage ay ang dalawang anak ni Bibas—sina Kfir, ang bunsong bihag na nagdaos ng kanyang pangalawang kaarawan kamakailan, at Ariel, na limang taong gulang. Ayon sa Hamas, napatay umano ang mag-iina noong Nobyembre sa isang airstrike ng Israel, ngunit hindi ito kinumpirma ng Israeli officials.
“Nasaan ang Bibas babies?” tanong ng Israeli foreign ministry sa isang social media post. “483 araw na ang lumipas. Nasaan sila?”
Mas Maayos na Palitan, Pagbubukas ng Rafah Border
Sa kabila ng kaguluhang dulot ng nakaraang palitan, mas naging organisado ang hostage handover nitong Sabado, kung saan mahigpit na binantayan ng armadong Hamas fighters ang lugar.
Matapos ang pagpapalaya ng mga bihag, inaasahang muling bubuksan ang Rafah border crossing papasok ng Egypt—isang mahalagang daanan ng humanitarian aid patungo sa Gaza.
Samantala, patuloy ang negosasyon para sa susunod na yugto ng ceasefire deal, na layong mapalaya ang natitirang mga bihag at pag-usapan ang mas matagalang tigil-putukan sa rehiyon.