Umabot sa 39,806 bahay at limang simbahang pamanang kultura ang nasira nang tumama ang magnitude 6.9 na lindol sa Cebu noong nakaraang linggo, ayon sa NDRRMC. Pinakamaraming pinsala ang naitala sa Daanbantayan, Medellin, San Remigio, Borbon, at Bogo City, habang naapektuhan din ang Bohol. Ayon sa DOT, nasira rin ang ilang pasyalan at simbahan, kabilang ang Sta. Rosa de Lima Shrine, Saints Peter and Paul Parish, San Isidro Labrador Church, San Juan Nepomuceno Parish, at San Vicente Ferrer Shrine. Kasalukuyang isinasailalim ang mga ito sa inspeksyon bago isumite sa NCCA para sa pagkukumpuni. Naiulat na 72 katao ang nasawi, 559 ang nasugatan, at 611,624 residente ang apektado.
Mahigit ₱138.6 milyon halaga ng tulong ang naipamahagi sa mga apektadong lugar sa Central Visayas. Bukod dito, limang cultural sites — Kabilin Center, Museo Sugbo, National Museum of the Philippines-Cebu, Yap-San Diego Ancestral House, at Casa Gorordo — ang nananatiling sarado habang isinasagawa ang safety inspection. Tinatayang 1,200 tourism workers ang pansamantalang nawalan ng trabaho dahil sa pinsala. Samantala, nanawagan si Fr. Edmar Marcellones ng Saints Peter and Paul Parish sa publiko na huwag kunin ang mga debris ng simbahan bilang souvenir o anting-anting, dahil itinuturing itong pagnanakaw at bahagi ng sagradong pamana ng simbahan.
Samantala, ayon sa DOLE-Central Visayas, magpapatuloy ang safety inspections sa mga kompanya sa Cebu, kabilang ang mga BPO establishments. Sinabi ni Director Roy Buenafe na anim na BPO companies ang iimbestigahan matapos ireklamo ng mga empleyado na pinabalik sa trabaho o hindi pinayagang lumikas sa gitna ng lindol. Dalawa sa mga kompanya ang pinatawan ng work stoppage order, at natuklasang ang isa ay walang disaster preparedness plan.