Hindi natinag si Tyrese Haliburton sa mga haka-hakang injured siya matapos mapansin ang kanyang paglalakad na may kunting paika-ika pagkatapos ng Game 2 loss kontra Oklahoma City Thunder.
Pero ngayong papalapit ang Game 3 ng NBA Finals, mariing sinabi ng Indiana Pacers star:
“Ayos lang ako. Walang dapat ipag-alala. Ready na ‘ko.”
Bagamat natalo ang Pacers sa Game 2 at tabla na ngayon ang serye sa 1-1, kumpiyansa si Haliburton na makakabawi sila. Ayon sa kanya, ang iniinda niya ay “minor lower leg thing” lang—walang malaking issue.
Si Coach Rick Carlisle naman ay umamin na may kaunting discomfort si Haliburton, pero normal na ito sa dulo ng isang mahaba at matinding season.
“Wala sa kanila ang 100% ngayon, pero walang magpapaawat,” ani Carlisle.
Mas iniintindi na lang ng coaching staff ang adjustments para sa mas solidong laro, lalo na’t halos laging lamang ang Thunder sa first two games.
“Panalo tayo sa Game 1, pero sa walong quarters, anim o pito doon lamang ang kalaban. Kailangan natin mag-iba ng diskarte,” dagdag ni Carlisle.
Samantala, si Pascal Siakam naman ay naniniwala na ang susi sa Game 3 ay depensa at rebounds.
“Kailangan nating makakuha ng stops at rebounds — ‘yun ang daan para makatakbo tayo sa transition. At doon tayo magaling.”
Bawi-mode na ang Pacers — at mukhang handang-handa na si Haliburton sa bakbakang muling magpapa-init sa NBA Finals!