Binalaan ni Sen. Risa Hontiveros nitong Lunes si Mayor Alice Guo ng Bamban, Tarlac, na posibleng maaresto matapos na ipadala ng abogado nito ang abiso na susuwayin muli ng suspendidong lokal na opisyal ang kasalukuyang imbestigasyon ng Senado sa ilegal na Philippine offshore gaming operator (POGO) hub sa kanyang bayan.
“Kung hindi niya susundin ang subpoena, nasa karapatan ng Senado na maglabas ng arrest order [laban sa kanya],” banta ni Hontiveros sa alkalde. “Dapat ay dumalo siya sa pagdinig sa Miyerkules nang walang dramahan.”
Payo niya kay Guo na ang pagbibigay ng katotohanan tungkol sa kanyang partisipasyon sa mga POGO activities “ay magbibigay sa kanya ng kapayapaan ng isip.”
Noong nakaraang linggo, naglabas ng hiwalay na subpoena si senador na nagsasangkot kay Guo at sa kanyang tatlong kapatid—Sheila, Seimen, at Wesley—upang dumalo sa July 10 na pagdinig ng Senate committee on women, children, family relations and gender equality na kanyang pinamumunuan.
Kasama rin sa subpoena ang kanilang mga magulang na sina Chinese nationals Jian Zhong Guo at Lin Wenyi na pinapakiusapan na dumalo sa pagpapatuloy ng Senate probe.
Bukod dito, naglabas din si Hontiveros ng hiwalay na subpoena laban kay Katherine Cassandra Li Ong, isa sa mga business partner ni Guo.
Natanggap ng abogado ni Guo, si Nicole Jamilla, ang mga hiwalay na subpoena noong Hulyo 5.