Matapos ang pagkakaaresto sa Indonesia, ibinalik kagabi sa Pilipinas si Alice Guo, dating mayor ng Bamban, Tarlac.
Kasama ni Guo ang mataas na antas ng delegasyon ng Pilipinas, pinangunahan nina Interior and Local Government Secretary Benhur Abalos at Philippine National Police (PNP) Chief Rommel Francisco Marbil. Nandun din ang mga opisyal mula sa National Bureau of Investigation (NBI), Bureau of Immigration, at iba pang ahensya ng gobyerno.
Ayon kay Col. Jean Fajardo, public information officer ng PNP, sakay si Guo at ang mga opisyal ng isang chartered flight mula Indonesia, na inaasahang dumating sa Royal Star Aviation Hangar sa Pasay City nitong Huwebes ng gabi.
Isang lugar para sa medical check-up at booking procedures ang inihanda para kay Guo.
“Siya ay dadalhin sa Camp Crame para pansamantalang ikulong,” ayon kay Fajardo sa isang press briefing.
Plano umano ng PNP na i-turn over si Guo sa Senate sergeant-at-arms ngayong araw.
Ayon kay Abalos, natakot si Guo para sa kanyang buhay kaya nagtago ito, ngunit naramdaman daw nito ang ginhawa nang mahuli ng mga awtoridad.
“Nang makausap ko si Alice, parang nakahinga siya nang maluwag. Naalala niya ang hirap ng pagtatago. Ginhawa na tapos na ang lahat,” ani Abalos, at idinagdag na ginagawa ang lahat para matiyak ang kanyang kaligtasan.
Inihayag ng mga opisyal noong Miyerkules ang pagkakaaresto kay Guo sa isang hotel sa Tangerang City, Indonesia, na nagtapos sa ilang buwang manhunt matapos maglabas ng arrest warrant ang Senado dahil sa hindi nito pagdalo sa mga pagdinig ukol sa mga Philippine offshore gaming operations (POGOs).