Maaaring maghanda ang mga motorista para sa isa na namang pagtaas ng presyo ng langis sa susunod na linggo dahil sa mga geopolitikal na sigalot, kung saan inaasahan ng mga industriya ang halos P2 dagdag kada litro.
Sa isang abiso noong katapusan ng linggo, sinabi ng Unioil na muling tataas ang presyo ng krudo mula Hunyo 25 hanggang Hulyo 1. Ayon dito, maaaring tumaas ng P1.70 hanggang P1.90 kada litro ang presyo ng diesel.
Samantala, ang gasolina ay maaaring tumaas ng P1.10 hanggang P1.30 kada litro. Ang mga pagtataya ng Department of Energy (DOE) ay nagpakita rin ng malalaking pagtaas ng presyo. Ayon sa forecast ng DOE, maaaring tumaas ang presyo ng gasolina ng P0.85 hanggang P1.15 kada litro.
Ang pagtaas sa presyo kada litro ng diesel at kerosene ay nasa pagitan ng P1.55 hanggang P1.85, at P1 hanggang P1.10, ayon sa pagkakasunod.
“Ang mga mahalagang balita ngayong linggo na nagdudulot ng pagtaas ng presyo ng langis ay ang patuloy na tensiyong geopolitikal at mga panganib sa suplay. Noong Hunyo 18, nagdulot ng sunog sa isang pangunahing terminal ng langis sa Russia ang pag-atake ng drone ng Ukraine habang ang ‘all out war’ ng Israel laban sa Hezbollah ng Lebanon ay nagdagdag sa tensiyon,” ayon kay Rodela Romero, direktor ng DOE’s Oil Industry Management Bureau.
Noong nakaraang linggo, itinaas ng mga kumpanya ng langis ang presyo ng mga produktong petrolyo ng hanggang P1.90 kada litro.
Noong Hunyo 18, sinabi ng DOE na ang year-to-date adjustments ng gasolina, diesel, at kerosene ay may netong pagtaas na P6.90, P6.00, at P0.35 kada litro, ayon sa pagkakasunod.