Matapos ang malinis na pagwawagi sa SEABA Qualifiers, hindi nagpapakampante ang Gilas Pilipinas Youth. Ayon sa head coach na si LA Tenorio, nagsisimula pa lang ang totoong laban—dahil susunod na ang mas matinding hamon sa FIBA U16 Asia Cup sa Mongolia ngayong Hulyo.
“Hindi pa ito ang end goal,” ani Tenorio matapos tambakan ng Gilas Youth ang Indonesia, 70-40, para kumpletuhin ang kanilang undefeated SEABA run. “Mahaba pa ang biyahe. Marami pang kailangang gawin.”
Isa sa mga agad na tututukan: ang pag-reassemble ng winning core, kahit abala na ang ilang players sa kani-kanilang school leagues gaya ng NCAA Juniors, UAAP, at pre-season tournaments gaya ng FilOil Cup.
Pero tiyak si Coach LA: “Committed sila. Gusto talaga nila lumaban para sa Asia Cup.”
Hindi rin nakaligtas sa pansin ng gobyerno ang performance ng Gilas Youth. Pinuri ni House Speaker Martin Romualdez ang team bilang “disciplined, fearless, and deserving champions,” at pinasalamatan si Tenorio sa pagiging inspirasyon at lider sa likod ng matagumpay na grupo.
“Ganito natin binubuo ang winning culture — may sistema, disiplina, at sipag,” dagdag pa ni Romualdez.
Ngayon, ang tanong: Makakasilat ba muli ang Gilas Youth sa mas malaking entablado? Abangan sa Mongolia!