Ibinahagi ni Gerald Anderson ang kanyang kasiyahan matapos maipasa ang unang eksenang siya mismo ang nagdirek para sa crime action-drama series ng ABS-CBN na “Sins of the Father,” na gawa ng JRB Creative Production. Isa siya sa mga direktor ng programa kasama sina FM Reyes, Bjoy Balagtas, at Avel Sunpongco. Bukod pa rito, siya rin ang bida bilang si Samuel Trinidad, isang bank manager na nasangkot sa mga kwento ng investment scam.
Ayon kay Gerald, ang unang eksenang kanyang idinirek ay kasama sina JC de Vera at LA Santos. “’Yun ‘yung unang eksenang pinamunuan ko — nung pumasok sila sa building. At nagpapasalamat ako sa kanila dahil hindi ko makakalimutan ‘yun,” aniya sa isang press conference. Pinuri rin niya ang buong production team, mula sa mga producer hanggang sa mga cameraman, at sinabing, “Hindi ko magagawa ito kung wala sila. Sobrang galing ng team.”
Ikinuwento rin ng aktor na hindi niya inaasahan na madidirek siya ng isang eksena — isang biglaang pagkakataon lang umano. “Nag-uusap lang kami nina Miss JRB (Julie Anne R. Benitez) at ng creative team tungkol sa mga eksenang ilalagay kay Samuel. Nagbigay ako ng mga suhestiyon at nagustuhan nila ang pagiging collaborative ng lahat. Hanggang sa tanungin ako ni Miss JRB kung gusto kong ako na ang magdirek. Sabi ko, ‘Wow, malaking karangalan ‘yon para sa akin.’”