Bumalik na ang Gen V para sa ikalawang season nito sa Prime Video, at agad nang sumabak sa mas matitinding aksyon at emosyonal na kwento.
Muling nagbukas ang kwento sa Godolkin University — ang elite school ng mga kabataang superheroes o “Supes.” Ngunit bago pa magsimula ang matitinding eksena, inialay muna ng serye ang pagbabalik sa yumaong aktor na si Chance Perdomo, na gumanap bilang Andre Anderson. Sa istorya, isinakripisyo ni Andre ang sarili para mailigtas sina Marie, Jordan, at Emma mula sa Elmira Rehabilitation Center.
Ngayong season, bumalik ang tatlong bida sa Godolkin, dala pa rin ang trauma at lungkot sa pagkawala ng kaibigan. Habang pinapakita sila bilang mga “problematiko,” sina Cate at Sam — na dating dahilan ng kanilang pagkakakulong — ay ngayo’y tinuturing na bayani. Pumasok din ang bagong dean na si Cipher, na may curriculum na lalong sumusubok sa limitasyon ng kanilang superpowers.
Bukod sa mga bagong misyon at labanan, tampok pa rin ang mga personal na tunggalian ng mga karakter — mula sa pakikipagkaibigan, relasyon, hanggang sa pagtuklas ng tunay nilang pagkatao. Ayon kay Jaz Sinclair (Marie), mas makikita ang kapangyarihan at pagtuklas sa sarili ng kanyang karakter ngayong season. Dagdag pa ni London Thor at Derek Luh (Jordan), mas mahirap na laban sa sarili at moral compass ang haharapin nila.
Hindi rin tipid sa aksyon ang bagong season: motel brawl, cage match, at brutal na training fights ang aasahan ng mga manonood. Pero higit sa lahat, ramdam ang emosyonal na bigat ng tribute kay Chance, na inilarawan ng mga co-stars bilang “puso ng serye.”
Para sa cast, hindi lang superpowers at laban ang tunay na kuwento ng Gen V kundi ang pagkakaibigan at samahan — sa screen man o off-cam.