Hindi pa tapos ang laban ng reigning champs!
Matapos ang unang dagok sa kanilang kampanya, handa nang bumangon ang La Salle at ibuhos ang galit sa winless Far Eastern U sa UAAP Season 87 men’s basketball tournament ngayong araw sa Smart Araneta Coliseum.
Magaganap ang laban sa 4:30 p.m., kung saan gustong makabawi ng Archers (3-1) laban sa Tamaraws (0-4) matapos ang nakakagulat na 75-71 pagkatalo sa nag-iinit na University of the East (2-2) noong nakaraang linggo.
“We’re not supernatural human beings. Tao pa rin kami,” sabi ni coach Topex Robinson matapos matalo ang La Salle matapos ang matikas na 3-0 simula.
“Hindi na kami pwedeng mag-focus sa nakaraan. Ang mahalaga ay ang laban sa harapan namin—ang FEU,” dagdag niya.
Bumagsak ang La Salle sa second place, kasunod ng walang talong UP (4-0). Pero kumpiyansa si Robinson na mas titibay pa ang kanyang koponan mula rito.