Opisyal nang bahagi ng “Pinoy Big Brother” (PBB) family ang Sparkle GMA artists na sina Gabbi Garcia at Mavy Legaspi! Sila ang pinakabagong hosts para sa paparating na “PBB: Celebrity Collab”, na magsisimula ngayong Marso 9.
Isa itong malaking hakbang sa patuloy na kolaborasyon ng GMA at ABS-CBN, na nagdala ng reality show sa Pilipinas 20 taon na ang nakalipas.
Gabbi at Mavy, Game sa Hosting Challenge!
Sanay na sa hosting sina Gabbi at Mavy, kaya handa silang sumabak kasama ang mga beterano at dating housemates na ngayon ay mga hosts na rin.
Si Gabbi ang tinaguriang “Kapuso It Girl ni Kuya”, habang si Mavy naman ay “Ang Kapuso Royal Tropa ni Kuya.”
“Ako ang maghahatid ng ‘PBB Updates’ tuwing weekdays, mula Lunes hanggang Biyernes,” ani Gabbi sa isang presscon. Magbibigay siya ng maiinit na balita sa loob ng Bahay ni Kuya tuwing umaga at hapon, pati na rin sa primetime at weekend episodes.
Samantala, makakasama naman ni Mavy ang Kapamilya star at dating “PBB Kumunity” housemate Alexa Ilacad sa “PBB” official online tambayan.
“Kami ni Alexa, bahala sa online! Maraming fans ang ‘PBB,’ kaya gusto naming gawing mas interactive at engaging ang experience nila,” ani Mavy. Kasama rito ang pagbabasa ng mga komento ng netizens at pagbibigay ng insights tungkol sa housemates.
Paghahanda para sa Hosting Gig
Todo ang paghahanda ni Gabbi para sa kanyang hosting debut sa “PBB.”
“Pinapanood ko ang past seasons at pinag-aaralan kung paano nila ginagawa ito,” aniya. Bukod dito, kinukuha rin niya ang payo ng veteran talk show host na si Boy Abunda, na dati ring mentor ni Bianca Gonzalez.
“Lagi akong nagtatanong sa mga co-hosts ko. Super generous nila sa pagbabahagi ng tips, kaya excited akong matuto pa,” dagdag niya.
Samantala, magbabalik-hosting din sina Bianca Gonzalez, Robi Domingo, Kim Chiu, Enchong Dee, Melai Cantiveros, at Alexa Ilacad para sa “PBB: Celebrity Collab.”
Huwag palampasin ang “PBB Celebrity Collab Edition” tuwing weeknights sa 10 p.m. at weekends sa 6:15 p.m. sa GMA! Abangan ang kwento ng bagong batch ng housemates na tiyak na kukurot sa ating puso!