Isang regional jet mula Kansas ang bumagsak sa Potomac River matapos itong bumangga sa isang military helicopter sa himpapawid malapit sa Reagan National Airport, ayon sa mga opisyal nitong Miyerkules.
Dahil sa insidente, agad na nagdeklara ng emergency response at pansamantalang pinatigil ang lahat ng flights sa paliparan.
Ayon kay Press Secretary Karoline Leavitt, inabisuhan na si Pangulong Donald Trump tungkol sa trahedya.
Sa ngayon, wala pang opisyal na impormasyon kung ilan ang sakay ng dalawang sasakyang panghimpapawid o kung may nasawi o nasugatan.
Ayon sa Federal Aviation Authority (FAA), ang PSA Airlines Bombardier regional jet ay bumangga sa isang Sikorsky H-60 military helicopter bandang 9 PM habang papalapit ito sa landing sa Reagan Airport. Ang jet ay lumipad mula sa Wichita, Kansas.
Samantala, sumabak na ang mga awtoridad, kabilang ang fireboats, sa rescue operations sa malamig na tubig ng Potomac River.