Nagpakitang-gilas si Karl Eldrew Yulo sa 3rd FIG Artistic Gymnastics Junior World Championships sa Pasay matapos makapasok sa apat na finals—individual all-around, floor exercise, vault at horizontal bar.
Sa men’s qualifications noong Huwebes, nagtala si Yulo ng 14.233 sa floor exercise, pangalawa lamang sa top-ranked Arsenii Dukhno. Nakakuha rin siya ng 13.750 sa vault (5th) at 13.700 sa horizontal bar (6th). Sa all-around, nagtapos siya na may total na 78.332, sapat para sa 15th place at tiket sa finals.
Bagama’t masaya, alam ng 17-anyos na marami pa siyang dapat patunayan. “Natupad yung isa ko pang wish, pero hindi pa tapos ang trabaho. Bibigay ko ang 100% o higit pa,” ani Yulo, na nakababatang kapatid ng Olympic champion na si Carlos Yulo.
Pinangungunahan ni Eldrew ang Philippine men’s team na kinabibilangan nina King Cjay Pernia (106th) at Hillarion Palles III (113th). Inamin niyang “bittersweet” ang kanilang resulta dahil kulang sa paghahanda ang mga kasama—isang buwang training lamang kumpara sa higit isang taon niyang preparasyon.
Gaganapin ang men’s all-around final sa Sabado, habang ang apparatus finals ay sa Linggo at Lunes—kung saan muling magtatangka si Yulo na mag-ukit ng pangalan sa world stage.