Sa loob lamang ng limang araw, muling pinatunayan ni Karl Eldrew Yulo na isa siyang rising star sa world gymnastics matapos masungkit ang kanyang ikalawang bronze medal sa 3rd FIG Junior World Artistic Gymnastics Championships na ginanap sa Marriott Grand Ballroom, Pasay City.
Nakamit ni Eldrew ang bronze sa men’s horizontal bar matapos umiskor ng 14.000, kabilang na ang 0.100 stick bonus, na nagpatibay sa kanyang podium finish. Ayon sa mga eksperto, ito ang pinaka-matapang at pinakamahirap niyang routine sa ngayon.
Bagama’t muntik na niyang maagaw ang silver, dinaig siya ng huling lumaban—ang Colombian na si Camilo Vera, na nagpasabog ng 14.533 para sa gold. Bumaba naman sa silver ang Amerikanong si Danila Leykin na nagtala ng 14.233.
Pero si Yulo pa rin ang pinakainabangan ng crowd, lalo na nang ibida niya ang makasaysayang execution ng Cassina 1 with full twist and crutch at isang triple back dismount—mga unang beses na nagawa ng isang Pinoy gymnast sa kompetisyon.
Kasama niya sa pagdiriwang ang kanyang kuya, ang Paris Olympics double gold medalist na si Carlos Yulo, na agad siyang niyakap at binati matapos ang awarding.
Ito na ang ikalawang bronze medal ni Eldrew ngayong linggo, matapos ang podium finish niya sa floor exercise. Sumubok pa siyang kumuha ng panibagong medalya sa vault, ngunit nahulog siya sa ika-apat na puwesto matapos magpakitang-gilas ang all-around champion na si Arsenii Dukhno ng Russia.