Nakamit ni pole vaulter EJ Obiena ang bronze medal matapos magtala ng 5.65 metro sa ISTAF Indoor Championships sa Düsseldorf, Germany—isang World Athletics Tour Silver event. Bagama’t hindi ito ang inaasam niyang resulta, mahalaga ang podium finish bilang unang hakbang sa kanyang hangaring makabalik sa Top 10 ng world rankings.
Nakipagsabayan si Obiena sa pitong atleta, kabilang ang tatlong nasa Top 10, ngunit nabigo siyang malampasan ang 5.70 metro sa tatlong pagtatangka kaya’t nagtapos sa ikatlong puwesto. Bumagsak sa No. 11 ang kanyang ranking noong nakaraang taon matapos ang ilang problemang pangkalusugan.
Nakuha ang ginto ni Dutch vaulter Menno Vloon (5.75m), habang pilak naman ang napunta kay American Sam Kendricks (5.70m). Lahat ng kalahok ay hindi naabot ang kani-kanilang personal best, na iniuugnay sa maikling indoor runway at maagang bahagi pa lang ng season.
Ayon sa kampo ni Obiena, nasa magandang kondisyon siya at may hanggang Marso 8 upang maabot ang 5.90 metro—ang qualifying standard para sa World Indoor Championships sa Poland sa Marso 20–22. Ang isa pang paraan ng pagpasok ay sa pamamagitan ng world rankings na nakabatay sa puntos mula sa mga kumpetisyon.