Inimbitahan ng House committee on human rights si dating Pangulong Rodrigo Duterte at ang kanyang dating hepe ng pulisya na si Sen. Ronald dela Rosa upang sagutin ang mga tanong tungkol sa kanilang anim na taong drug war na nag-iwan ng libu-libong patay.
Inimbitahan din bilang resource person si dating Sen. Leila de Lima, isang matinding kritiko ng madugong kampanya kontra droga ni Duterte, na nitong Lunes ay nalinis sa huling tatlo sa mga kasong illegal drug trading na isinampa laban sa kanya noong nakaraang administrasyon.
Sa pag-imbita kina Duterte at De Lima, binibigyang-daan ng panel ang posibleng paghaharap ng dalawang magkatunggali sa politika.
Naniniwala ang kampo ng dating justice secretary na ang mga kasong droga laban sa kanya ay isinampa bilang ganti sa kanyang kritisismo sa drug war at sa nauna niyang imbestigasyon sa mga vigilante-style killings ng tinaguriang Davao Death Squad sa hometown ng dating pangulo.
“Gusto ko sanang magbigay-galang sa dating pangulo at sa senador, pero dahil sa bigat ng mga testimonya ng [mga pamilya ng mga biktima,] kailangan nilang harapin ang mga taong ito,” sabi ni Manila Rep. Bienvenido Abante Jr., chair ng House committee.
“Marahil ay maaaring tingnan ng dating pangulo ang kanyang puso at mapagtanto ang kanyang nagawa sa loob ng anim na taon,” dagdag niya.