Permanente nang binawi ng Land Transportation Office (LTO) ang lisensya ng UV Express driver na sangkot sa malagim na banggaan sa Commonwealth Avenue, Quezon City, matapos itong magpositibo sa paggamit ng shabu.
Kinilala ang driver na si Ruel Dela Cerna, 51 anyos, na ayon sa ulat ng PNP Crime Laboratory, ay nagpositibo sa methamphetamine hydrochloride (shabu) sa isinagawang drug test noong Oktubre 17.
Inamin mismo ni Dela Cerna na gumamit siya ng droga noong gabi bago ang aksidente, kung saan isang pasahero ang nasawi at 13 pa ang sugatan. Ang minamaneho niyang UV Express (UWL-894) ay sangkot sa karambola ng 14 na sasakyan, na nagdulot ng matinding trapiko sa lugar.
Ayon kay Acting Transportation Secretary Giovanni Lopez, hindi na kailanman papayagang magmaneho ng pampublikong sasakyan si Dela Cerna.
“Tinitiyak namin na hindi na siya muling makapagmaneho. Ang kaligtasan sa kalsada ay pangunahing utos ni Pangulong Marcos,” ani Lopez.
Dagdag naman ni LTO chief Markus Lacanilao, ang mga driver, lalo na ng pampublikong sasakyan, na mahuhuling gumagamit ng ilegal na droga ay habambuhay na tatanggalan ng lisensya.
Kasalukuyang nakakulong si Dela Cerna sa QCPD Traffic Enforcement Unit at haharap sa mga kasong reckless imprudence resulting in homicide, multiple physical injuries, at paglabag sa Anti-Drunk and Drugged Driving Act of 2013, na may parusang hanggang 20 taon na pagkakakulong.