Sa kabila ng pagkakasangkot sa isang malaking isyu ng korapsyon noong 2025, nanatiling ikalawa sa may pinakamalaking pondo ang Department of Public Works and Highways (DPWH) sa 2026 national budget, na may alokasyong P530.9 bilyon.
Pangalawa lamang ang DPWH sa Department of Education na nakatanggap ng rekord na P1.015 trilyon. Sumunod naman ang Department of Health, DILG, at Department of National Defense batay sa datos ng Department of Budget and Management.
Orihinal na humiling ang DPWH ng P850 bilyon para sa 2026, bago sumabog ang kontrobersiya kaugnay ng umano’y katiwalian sa flood control projects. Matapos ang iskandalo, malaking bahagi ng hinihinging pondo ang inilipat sa ibang ahensya gaya ng DepEd, DOH, DA, at DSWD, habang ang iba ay itinuring na “material savings.”
Gayunman, ayon sa pamahalaan, nanatili sa DPWH ang ilang pondo para sa foreign-assisted flood control projects, bagama’t hindi pa inilalantad ang eksaktong halaga.
Noong 2025, naging sentro ng imbestigasyon ang DPWH matapos mabunyag ang umano’y kickback scheme sa pekeng flood control projects na nagkakahalaga ng bilyun-bilyong piso. Dahil dito, nanawagan ang mga mambabatas at watchdog groups na bawasan ang badyet ng ahensya at ilipat ito sa mas mahahalagang serbisyong panlipunan at programang may malinaw na pananagutan.