Matapos ang 6.9 magnitude na lindol na tumama sa Cebu, agad na inatasan ng Department of Public Works and Highways (DPWH) ang lahat ng lokal na building officials na magsagawa ng rapid assessment sa mga gusali sa kanilang nasasakupan.
Ayon kay DPWH Undersecretary Arrey Perez, prayoridad muna ang mabilis na pagsusuri bago talakayin ang long-term na plano para sa mas matibay na disenyo at mahigpit na pagpapatupad ng National Building Code.
Agad ding nagtungo sa Cebu si DPWH Secretary Vince Dizon sa utos ni Pangulong Marcos upang inspeksyunin ang pinsala. “Una naming tungkulin ang mag-clear ng mga kalsada. 24/7 kaming nagtatrabaho para matiyak na tuloy-tuloy ang daloy ng tulong at serbisyo lalo na sa Bogo City at mga karatig-LGU,” ani Dizon.
Samantala, nanawagan si Bacolod Rep. Albee Benitez na magkaroon ng malawakang review ng lahat ng imprastraktura ng bansa para matiyak na kayang makayanan ng mga ito ang mga sakuna. Giit niya, dapat papanagutin ang mga responsable sa “shoddy work” at tiyaking walang gusali, tulay o kalsada ang magdudulot ng dagdag na pinsala o buhay na masasayang.
Kasabay nito, tiniyak ng Department of Budget and Management (DBM) na may nakahandang ₱8 bilyon para sa Quick Response Fund, habang ang National Disaster Risk Reduction and Management Fund ay naka-standby para sa mas malakihang pangangailangan tulad ng pagkukumpuni ng mga pasilidad at heritage sites.
Nagbabala naman si Science Secretary Renato Solidum Jr. na kung tatama ang katulad na lindol sa Metro Manila, posibleng libo ang mamatay dahil sa dami ng gusali at siksik na populasyon. Paalala niya, dapat seryosohin ang paghahanda sa banta ng tinaguriang “The Big One”, isang 7.2 magnitude quake na maaring mangyari anumang oras sa hinaharap.