Hindi titigil ang operasyon ng EDSA Busway kahit may gagawing rehabilitasyon sa pangunahing kalsada, ayon kay Transportation Secretary Vince Dizon.
“Hindi natin isasara ang EDSA Carousel. Magpapatuloy ang operasyon nito, pero may ilang adjustments depende sa lugar kung saan gagawa ang DPWH,” sabi ni Dizon sa isang press conference.
Ayon sa MMDA, magpapatawag sila ng inter-agency meeting para pag-usapan ang EDSA rehabilitation na magsisimula ngayong buwan. Sa ngayon, hinihintay pa nila ang traffic management plan ng DPWH para mapanatili ang daloy ng sasakyan sa abalang kalsada ng Metro Manila.
Napagkasunduan din ng DOTr at DPWH na ang DOTr ang mamamahala sa pagkukumpuni ng mga busway stations. Target ng gobyerno na matapos ang buong rehabilitasyon, kabilang ang drainage works, bago ganapin ang ASEAN Summit sa bansa sa susunod na taon.