Kinumpirma ng Department of Justice (DOJ) na kinansela na ang pasaporte ng dating presidential spokesperson Harry Roque at co-accused na si Cassandra Li Ong kaugnay ng qualified human trafficking na isinampa laban sa kanila. Umano’y konektado sila sa ilegal na operasyon ng isang POGO hub sa Porac, Pampanga.
Kasama ring kanselado ang pasaporte nina Roselyn Baterna at Dennis Cunanan, na pawang co-accused sa kaso.
Ayon sa DOJ spokesman Polo Martinez, wala pang inilalabas na red notice ang Interpol laban kay Roque:
“Only the court can issue a cancellation of the passport, and the request for red notice typically follows,” paliwanag niya.
Nanawagan ang DOJ kay Roque na bumalik sa Pilipinas upang harapin ang mga kaso. Sa ngayon, sinasabing naghahanap siya ng asylum sa Netherlands at gumagamit ng principle of non-refoulement bilang depensa.
Si Ong naman ay iniulat na nasa Japan.
Patuloy ang pag-usad ng kaso habang hinihintay kung magsusumite ng red notice request ang korte, na maaaring magpabilis ng pag-aresto sa mga akusado sa ibang bansa.