Kung naghahanap ka ng trabaho, subukan mo na sa Department of Education (DepEd), na nahihirapan ngayong punan ang mahigit 40,000 bakanteng posisyon, kasama na ang mga bagong teaching at non-teaching roles.
Inutusan ni Education Secretary Juan Edgardo Angara ang lahat ng DepEd offices na agad na punan ang mga bakanteng posisyon na naging hamon para sa ahensya.
Sa memo noong Agosto 5, ipinag-utos ni Angara sa mga bureau at service directors, regional directors, at schools division superintendents na “gawin ang lahat ng paraan para mapabilis” ang hiring.
Sa kasalukuyan, mayroong 46,703 vacancies ang DepEd, o 4.53 porsiyento ng kabuuang 1,030,897 authorized positions.
“Sinasalamin ng mga natitirang bakanteng posisyon ang hamon sa operasyon ng mga opisina at sa absorptive capacity ng DepEd,” sabi sa DepEd Memorandum No. 42.
Ayon kay Angara, lahat ng DepEd field offices ay kailangan gumawa ng “catch-up plan” para maayos na subaybayan ang hiring. Ang planong ito ay dapat isumite sa DepEd’s Bureau of Human Resource and Organizational Development-Personnel Division bago o sa Agosto 9.
Noong Mayo, inaprubahan ng DBM ang paglikha ng 5,000 non-teaching posts para sa DepEd upang maibsan ang administrative tasks ng mga guro, ayon sa utos ng dating Education Secretary at kasalukuyang Vice President Sara Duterte.
Sinabi ni Duterte na ang pagtanggal ng mga administrative tasks ay magbibigay-daan sa mga guro na mag-focus sa pagtuturo at mga classroom duties.
Ngunit maraming teachers’ groups ang nagreklamo na ang 5,000 non-teaching posts ay hindi sapat para sa higit 47,000 pampublikong paaralan sa buong bansa.
Iminungkahi ng Alliance of Concerned Teachers (ACT) na magtalaga ng dalawa o higit pang administrative personnel sa bawat pampublikong paaralan.