Mariing ipinagtanggol ni Dennis Trillo ang kanyang asawang si Jennylyn Mercado matapos kumalat ang tsismis na may umano’y alitan ito sa pamilya ng aktor.
Sa isang vlog ni Ogie Diaz noong Enero 9, binanggit ang mensahe ng isang source na nagsabing hindi raw maayos ang relasyon ni Jennylyn sa mga magulang at kapatid ni Dennis. Ayon sa ulat, matagal na umanong hindi nagkikita o nagkakausap ang aktres at ang kanyang mga biyenan, at may paratang pang pinipigilan daw nito si Dennis na makasama ang pamilya—bagay na hindi direktang pinagtibay at nais daw marinig ang panig ni Jennylyn.
Hindi nagpatumpik-tumpik si Dennis at naglabas ng pahayag sa Facebook noong Enero 11 upang linawin ang isyu. Ayon sa aktor, isa si Jennylyn sa pinakamabubuting taong dumating sa kanyang buhay at isang pribilehiyo na siya ang pinili nitong makasama habang-buhay. Hiniling din niya na huwag nang idamay ang kanyang mga magulang na may edad na at hindi naman bahagi ng showbiz.
Binigyang-diin ni Dennis na mahal niya ang kanyang asawa, mga kapatid, at mga magulang, at maayos ang kanilang samahan kahit hindi sila madalas magkakasama dahil sa abalang iskedyul. Sa huli, nanawagan ang aktor na iwasan ang paninira at sa halip ay magpokus sa pagiging mabuting tao at sa mas mahahalagang isyung kinahaharap ng bansa.
Para kay Dennis, maikli ang buhay—kaya’t mas mahalagang piliin ang kaligayahan at kabutihan araw-araw.