Nagpahayag ng suporta si dating Senador Panfilo Lacson sa ideyang magkaroon ng kasunduan ang Pilipinas at China pagdating sa paggalugad ng langis at natural gas sa West Philippine Sea. Naniniwala siya na ang 60-40 na hatian, kung saan mas malaki ang mapupunta sa mga Pilipino, ay isang praktikal na hakbang upang masolusyunan ang krisis sa enerhiya ng bansa.

Ayon kay Lacson, hindi dapat manatiling nakatengga ang mga likas na yaman sa ilalim ng dagat habang patuloy na nahihirapan ang mga mamamayan sa mataas na presyo ng kuryente at petrolyo. Iginiit niya na hangga’t kinikilala ng China ang soberanya ng Pilipinas sa ilalim ng ating Konstitusyon, maaari itong maging susi sa pag-unlad ng ekonomiya.

Binigyang-diin din ng dating mambabatas na kailangan ng bansa ng teknolohiya at pondo na mayroon ang malalaking bansa tulad ng China upang matagumpay na makuha ang mga resources na ito. Para sa kanya, mas mainam ang diplomasya at pagtutulungan kaysa sa patuloy na tensyon na walang naibubungang pakinabang para sa publiko.

Sa huli, pinaalalahanan ni Lacson ang pamahalaan na dapat maging maingat sa anumang negosasyon. Dapat aniyang tiyakin na protektado ang interes ng bansa at sumusunod ang anumang kasunduan sa mga batas ng Pilipinas upang hindi malagay sa kompromiso ang ating teritoryo.

Kasaysayan ang naisulat ng mga Pilipinong runner sa Tokyo Marathon matapos mabasag ang 22-taong national record sa marathon na hawak ni Eduardo Buenavista.

Nauna si Sonny Wagdos na nagtala ng 2:14:32 (58th place), kasunod si Richard Salano na may 2:15:08 (68th place). Nalampasan nila ang dating rekord na 2:18:44 na itinakda ni Buenavista noong 2004 sa Japan.

Sa women’s side, nagningning din ang mga Pinay. Si Artjoy Torregosa ay nagtala ng 2:33:54 (26th place) at binasag ang siyam na taong rekord ni Mary Joy Tabal na 2:43:31 noong 2016. Sumunod si Christine Hallasgo na may oras na 2:42:13 (43rd place).

Malapit din sa dating marka si Arlan Arbois Jr. matapos magtala ng 2:19:56.

Pinangunahan ng Tadese Takele ang karera sa oras na 2:03:37.

Sa social media, nagpahatid ng pagbati si Buenavista sa mga bagong record-holder. Maging si Tabal ay nagpaabot din ng congratulations sa mga atletang nagdala ng bagong karangalan sa bansa.

Tinawag ni Bryan Adams na “the best night we ever had” ang kanyang konsiyerto sa Maynila matapos ang isang punô, masigla at emosyonal na gabi kasama ang Filipino fans sa SM Mall of Asia Arena noong Sabado, bilang bahagi ng kanyang “Roll With the Punches Tour Live,” na inihandog ng Wilbros Live.

Sa halip na karaniwang grand entrance, sinorpresa ni Bryan ang audience nang magsimula siyang kumanta mula sa isang maliit na platform malapit sa crowd. Binuksan niya ang show gamit ang mga klasikong Can’t Stop This Thing We Started at Straight from the Heart, bago lumipat sa main stage para sa sunod-sunod na paboritong kanta tulad ng Run to You, Somebody, at Kick Ass.

Mas lalong naging bongga ang gabi sa mga higanteng props tulad ng inflatable boxing glove at vintage car, habang pinasaya niya ang fans sa mahigit 20 kanta, kabilang ang mga paboritong pang-karaoke na Please Forgive Me at (Everything I Do) I Do It for You. Nagningning din ang arena sa pulang at asul na ilaw mula sa wristbands ng audience.

Pinatawa at pinatayo ni Bryan ang lahat sa You Belong to Me, hinikayat ang fans na sumayaw—o mag-“twerk,” biro niya—habang ang iba’y nagwagayway pa ng bandila ng Canada. Sa mas emosyonal na bahagi ng gabi, kinilig ang crowd nang baguhin niya ang linya ng Have You Ever Really Loved a Woman? sa “Have you ever loved a Filipino woman?”

Nagtapos ang konsiyerto sa mga awiting Summer of ’69, Cuts Like a Knife, at isang stripped-down na All for Love, bago muling pasalamatan ni Bryan ang mga Pinoy. Ayon sa kanya, matagal na nilang inaabangan ang pagbabalik sa Pilipinas—at ang gabing iyon ay tunay na hindi nila malilimutan.