Matagumpay na nag-uwi ng anim na medalya ang Philippine benchrest shooting team mula sa WRABF World Cup 2025 na ginanap sa Ruutikangas Range, Oulu, Finland.
Bida sa kampanya si Miguel Archangel Cruz, na nakasungkit ng ginto sa World Light Air Rifle (Junior Division) at dalawang bronse sa World Light Rimfire at World Heavy Rimfire Rifle (Junior Division). Si Cruz ay anak ni Usec. Gilberto Cruz, executive director ng PAOCC.
Bukod dito, nakamit din ng Pilipinas ang ikatlong puwesto sa Team Overall, sa tulong nina Ronald Robles, Celedonio Tayao at Cruz, laban sa 28 bansang kalahok.
Kasama rin sa delegasyon sina Jimmy Maniwang, Ramon Diaz Jr., Richard Cases, Jose Maria Esteban, Vincent Troy Monte, Rosinee Monte, Valentin Miguel Lopez, at Rafael Cruz Jr. Pinamunuan ang koponan ni Delia Quidato at coach Maria Marcia Cleofas, kasama ang suporta ng pamilya at mga opisyal.
Nagpaabot ng pagbati ang PAOCC, na iginiit na dala ng koponan ang karangalan, disiplina, at husay ng mga Pilipino sa pandaigdigang entablado.