Kahit naka-rest si Tots Carlos, kinapos pa rin ang ZUS Coffee laban sa Creamline, 25-22, 28-30, 26-24, 17-25, 15-13, sa Premier Volleyball League All-Filipino Conference sa PhilSports Arena.
Nagbida si Alyssa Valdez na parang bumalik ang prime years niya, bumira ng 17 puntos, kasama sina Bernadeth Pons (17), Jema Galanza (15), at Michele Gumabao (14). Kahit muntik nang madulas sa limahan, nakamit ng Cool Smashers ang ika-apat nilang sunod na panalo.
“Hindi kami proud kasi limahan, pero saludo kami sa ZUS, ang ganda ng laro nila. Swerte nanalo kami,” ani Valdez.
Bumawi ang Creamline mula sa 9-11 deficit sa fifth set at ipinakita ang tibay ng puso. Samantala, nalaglag sa 2-3 ang Thunderbelles, sa kabila ng solidong laro ni Kate Santiago.