Inihayag ng Commission on Elections (Comelec) na kinansela ang registration ng Duterte Youth party-list dahil sa paglabag sa election rules. Sa isang 2-1 na desisyon noong Hunyo 18, tinanggap ng Comelec Second Division ang petisyon na isinampa noong 2019 laban sa grupo, kaya void na ang kanilang registration.
Hindi tumalima ang Duterte Youth sa mga legal na requirements tulad ng hindi pag-publish ng kanilang petisyon at hearing notice sa dalawang pambansang pahayagan, isang mahalagang proseso para sa transparency at accountability. Dahil dito, tinukoy ng Comelec na “void ab initio” o hindi valid mula pa sa simula ang kanilang registration.
Noong 2019, lahat ng nominado ng Duterte Youth ay umatras, kaya sinubukan ni Ronald Cardema, ang chairperson nila, na maging nominado kahit lampas na siya sa edad na kinakailangan. Tinanggihan ito ng Comelec at pinanatili ang desisyon noong 2020.
Binatikos din ng Comelec ang grupo dahil sa pag-promote ng karahasan at mga pahayag nila na naghihikayat ng paggamit ng dahas laban sa mga kritiko at aktibista. Isa sa mga inilabas na halimbawa ay ang post na, “Uubusin kayo ng Duterte Youth,” na tinawag ng Comelec na “hindi lang basta pulitikal na pananalita kundi panawagan sa karahasan.”
Bagamat kinansela ang registration ng Duterte Youth, maaari pa silang mag-file ng motion for reconsideration. Kung maaprubahan ito, posibleng maibalik ang kanilang status at makakuha ng upuan sa Kongreso.
Sa kabila ng pagkakakuha nila ng mahigit 2.3 milyong boto sa 2025 midterm elections at posibleng makakuha ng tatlong upuan, hangga’t hindi nababawi ang desisyon, hindi sila makakapag-claim ng puwesto.