Ipinatawag ng Criminal Investigation and Detection Group (CIDG) ang apat na umano’y pasimuno ng marahas na protesta sa Mendiola noong Setyembre 21, ngunit isa lamang sa kanila ang humarap sa imbestigasyon sa Camp Crame.
Ayon kay CIDG spokesperson Maj. Helen de la Cruz, hindi muna pinangalanan ang mga iniimbestigahan habang nagpapatuloy ang kaso. Ngunit isang source ang nagkumpirmang si Park Alamada Pangawilan ang nagpakita sa CIDG—ang parehong lalaking nakunan sa viral video na nagtatanong sa mga raliyista kung may dalang lighter.
Sa naturang kaguluhan, ilang nakamaskarang indibidwal, kabilang ang mga menor de edad, ang nagsunog ng shipping container sa Ayala Bridge na nagsilbing harang ng pulisya patungong Malacañang.
Depensa ni Pangawilan, hindi umano niya hinikayat ang mga raliyista na magsunog. Aniya, ang lighter ay para lamang sa candle lighting activity sa Don Chino Roces Bridge at sinaway pa raw niya ang mga nanggugulo.
Babala naman ni PNP spokesperson Brig. Gen. Randulf Tuano, ang tatlong hindi sumipot sa subpoena ay maaaring multahan ng hanggang ₱30,000 at makulong ng hanggang anim na buwan kung patuloy nilang babalewalain ang utos ng CIDG.