Tahimik ngunit puno ng saya ang pagdating ng unang anak nina Chris Evans at Alba Baptista, matapos ipanganak ni Alba ang kanilang baby girl na pinangalanang Alma Grace nitong nakaraang weekend sa Massachusetts, kung saan naninirahan ang mag-asawa.
Ayon sa ulat ng TMZ, maingat na iningatan ng celebrity couple ang pribadong sandaling ito, katulad ng kanilang naging tahimik na kasal noong 2023. Kumpirmado rin ng People magazine na magkasama ngayon sina Chris at Alba na “enjoying their privacy and these special first few days as a family.”
Nagsimulang mag-ugat ang balitang buntis si Alba noong Hunyo, nang magkomento ang kanyang ama sa isang Father’s Day post na “turn na ni Chris.”
Nag-umpisa umano ang relasyon ng dalawa noong 2021, at opisyal na kinumpirma ito noong Nobyembre 2022, kung saan inilarawan silang “seryoso, masaya, at in love.”
Si Alba Baptista ay kilala sa kanyang mga papel sa “Warrior Nun” at sa pelikulang “Mrs. Harris Goes to Paris.” Samantala, abala si Chris Evans ngayong 2025 sa mga proyekto tulad ng “Materialists,” “Honey Don’t,” at “Sacrifice.”
Bago pa man maging ama, nabanggit na ni Chris sa isang panayam sa People noong 2022 — nang hirangin siyang Sexiest Man Alive — na pangarap niyang bumuo ng pamilya.
“Sa huli, hindi trabaho ang pinakapinagmamalaki ng tao, kundi ang mga relasyon at pamilyang nabuo nila,” aniya.
Ngayon, natupad na ni Captain America ang isa sa pinakamahalaga niyang papel — bilang ama.