Kinumpirma ng Philippine Navy na patuloy ang pagdagsa ng mga Chinese military, coast guard, at maritime militia vessels sa Subi Reef malapit sa Pag-asa Island sa West Philippine Sea. Ayon kay Rear Admiral Roy Vincent Trinidad, ginagamit ng China ang Subi Reef bilang “parking area” ng kanilang mga barko, na minsang umaabot sa 150-200.
“Illegal ang presensya nila sa ating teritoryo,” ani Trinidad, idinagdag na ginawa ng China ang Subi Reef bilang fully operational naval base mula noong 2012.
Samantala, nagkaroon ng pagpupulong sina AFP Chief Gen. Romeo Brawner Jr. at Japan Air Self-Defense Force Chief Gen. Uchikura Hiroaki sa Camp Aguinaldo para palakasin ang ugnayang militar ng Pilipinas at Japan. Layunin ng kanilang pag-uusap ang pagpapabuti ng seguridad sa Indo-Pacific region.