Ayon sa isang pag-aaral ng Lowy Institute ng Australia, inaasahang mas lalakas ang impluwensya ng China sa pag-unlad ng Southeast Asia habang binabawasan ng US at iba pang Kanluraning bansa ang kanilang development aid.
Mula 2025 hanggang 2029, pitong bansang Europeo kabilang ang France at Germany, kasama ang European Union, ay magbabawas ng humigit-kumulang US$17.2 bilyon na pondo. Ang UK naman ay magbabawas ng US$7.6 bilyon taunang ayuda para ilaan sa depensa.
Dahil dito, maaaring bumaba ng higit US$2 bilyon ang development finance sa Southeast Asia pagsapit ng 2026, na makakaapekto sa mga mahihirap na bansa gaya ng East Timor, Cambodia, Laos, at Myanmar.
Sa kabilang banda, umakyat sa US$4.9 bilyon ang development finance ng China sa rehiyon noong 2023, karamihan ay para sa malalaking proyekto tulad ng riles at pantalan. Tinatayang aabot na rin sa halos US$10 bilyon ang kabuuang infrastructure commitments ng China.
Babala ng pag-aaral, ang pagbaba ng tulong mula sa Kanluran ay maaaring magpahina sa kakayahan ng mga bansa sa Southeast Asia na makipagnegosasyon nang patas, lalo na’t mas lumalakas ang impluwensya ng Beijing.