Pinangunahan ni Jayson Tatum ang Boston Celtics sa isang dominanteng panalo kontra Golden State Warriors, 125-85, sa San Francisco nitong Lunes bilang bahagi ng NBA Martin Luther King Jr. Day slate. Naglista si Tatum ng game-high 22 points, kasama ang nine rebounds, seven assists, at dalawang steals.
Sumuporta sina Kristaps Porzingis na may 18 points at Jaylen Brown na may 17. Ito ang ikalawang pagkakataon ngayong season na nagtagpo ang dalawang koponan, kung saan nagbawi ang Boston matapos matalo sa kanilang unang laban noong Nobyembre.
Ang 40-point blowout na ito ay ang pinakamalaking talo ng Warriors sa home court nila sa loob ng 40 taon—mula pa noong Enero 15, 1985. Katulad din ito ng 140-88 pagkatalo na ibinigay ng Celtics sa Warriors noong Marso ng nakaraang season.
Bagamat nagbuhos ng 18 points si Stephen Curry, hirap siya mula sa labas ng arc, na may 4-of-12 shooting mula sa three-point range. Nag-ambag naman si Payton Pritchard ng 14 points at game-high nine assists para sa Boston.
Matapos ang malupit na tagpong ito, malinaw na hindi lang basta nagbawi ang Celtics—nangibabaw pa sila sa laban!