Kinasuhan ng National Bureau of Investigation (NBI) si Mary Joy dela Cerna Lacierda, isang vlogger mula Cebu, dahil sa umano’y pagpapakalat ng maling impormasyon tungkol sa pahayag ni NBI Director Jaime Santiago tungkol sa mga overseas Filipino workers (OFWs).
Ang vlogger ay nag-post ng isang video sa social media kung saan makikita si Santiago na may hawak na mikropono at may caption na: “Bagong pananakot sa mga OFW”. Ayon sa NBI, maling-mali ang interpretasyon ng video at ito ay nagbigay ng maling impresyon na nagbanta si Santiago sa mga OFW.
Paliwanag ni Santiago, ang mga pahayag niya ay para sa mga vloggers na may mga kasong legal, whether nasa Pilipinas o nasa ibang bansa. Sinabi niya na kung ang mga vloggers na ito ay babalik sa bansa at may mga warrants of arrest, haharapin nila ang batas. Iniiwasan niya ang pagkakaroon ng maling interpretasyon, at nilinaw niya na hindi niya tinutukoy ang mga OFW.
Nang kumalat ang video, umabot ito ng 58,000 views at nagdulot ng galit sa mga netizens, pati na rin ang mga panawagan na itigil ang pagpapadala ng remittances. Dahil dito, kinasuhan si Lacierda ng unlawful use of means of publication, unlawful utterances, at inciting to sedition sa ilalim ng Cybercrime Prevention Act of 2012.
Ayon kay Santiago, ang maling pagpapalabas ng kanyang pahayag ay nagdulot ng hindi kinakailangang galit mula sa publiko.