Matapos ang tatlong dekada na puro sa Maynila ginaganap, malapit nang madala sa Cebu ang sikat na palabas na Disney On Ice.
Ayon kay Arnel Gonzales, VP at GM ng Mall of Asia Arena, nasa 70% na ang konstruksyon ng Seaside Arena na itinayo katabi ng SM Seaside City mall. Kapag natapos, ito ang magiging pinakamalaking indoor arena sa Cebu na may kapasidad na 16,000 tao. Kabilang ito sa mas malawak na Seaside City Complex na magkakaroon din ng convention center at bayfront hotels.
Layunin umano ng SM na maihatid ang world-class live entertainment sa iba’t ibang panig ng bansa—at kabilang dito ang posibilidad na dalhin ang Disney On Ice sa Cebu.
Kinumpirma rin ni Matthew Garrick, VP ng Feld Entertainment Asia-Pacific, na ang Philippine run ng Disney On Ice ay bahagi ng isang regional tour na kasama ang Japan, China, at Australia. Aniya, kapag may bagong merkado tulad ng Cebu, maaari itong maisama sa tour schedule.
Ngayong Disyembre, magbabalik ang Disney On Ice sa Maynila sa ilalim ng temang Magic in the Stars. Tampok dito ang higit 55 Disney characters—ang pinakamarami sa kasaysayan ng palabas sa Pilipinas. Mapapanood sina Aladdin, Cinderella, Moana, Rapunzel, Elsa at Anna ng Frozen 2, pati na sina Lightning McQueen ng Cars, Asha mula sa Wish, at Raya ng Raya and the Last Dragon.
Kung matutuloy, unang beses itong mapapanood sa labas ng Maynila at tiyak na magiging malaking kaganapan para sa mga pamilyang Cebuano.