Nagwala ang bulkang Lewotobi Laki-Laki sa silangang Indonesia nitong Huwebes, anim na beses na nagbuga ng abo at lumipad ang usok ng limang milya pataas, kasama pa ang nakakakilabot na kidlat! Nagsilikas ang mga residente habang umaalingawngaw ang pagsabog.
Unang sumiklab noong Lunes at Martes ang bundok, na nagdulot ng siyam na pagkamatay at sapilitang pagpapalikas sa mga nakatira sa loob ng pitong kilometrong danger zone.
Ayon sa volcanology agency, ito na ang pinakamalaking pagsabog ng bulkan na nakita ng maraming residente. “Simula noong tumira ako dito, ngayon lang ako nakakita ng ganito kalakas na pagsabog,” sabi ni Anastasia Adriyani, 41, na nakatira malapit sa exclusion zone.
Itinaas na rin ang alert level ng bulkan sa pinakamataas na antas. Bagamat wala pang ulat ng pinsala, kitang-kita ang takot sa mukha ng mga residente at estudyante habang nagtatakbuhan papalayo sa kanilang mga bahay.
Nagdurusa ang evacuees sa takot at lungkot sa bawat pagsabog ng bulkan. “Nakakalungkot isipin ang aming baryo, at tuloy-tuloy pa rin ang pagsabog mula kagabi hanggang ngayon,” sabi ng evacuee na si Antonius Puka, 56.
Ang Indonesia ay nasa “Ring of Fire,” kaya madalas ang mga paggalaw ng lupa at pagputok ng bulkan sa rehiyong ito ng Pasipiko.