Ang Korean singer na si Jin ng BTS ay makikita sa bagong Netflix reality series na “Kian’s Bizarre B&B” na pinangungunahan ng entertainer na si Kim Hee-min, kilala rin bilang Kian84.
Ilang Korean media outlets ang nagbalita tungkol sa paglahok ni Jin sa show hanggang sa opisyal itong kinumpirma ng Netflix sa kanilang Korean content accounts sa social media.
Makakasama rin ni Jin sa “Kian’s Bizarre B&B” ang aktres na si Ji Ye-eun, na kilala sa kanyang pag-appear sa “Running Man” at “SNL Korea.”
“Kilalanin ang aming dalawang magagandang empleyado!” pabirong anunsyo ng Netflix. “Kapag sina Jin at Ji Ye-eun ang nagse-serve sa iyo, talagang kakaibang B&B ito.”
Ang show na ididirek ni Jung Hyo-min ay magpapakita kay Kian84 na nagpapatakbo ng isang kakaibang guesthouse sa Ulleungdo Island.
Ang “Kian’s Bizarre B&B,” na kasalukuyang nagso-shoot, ay mapapanood na sa Netflix sa susunod na taon.
Si Jin, na siyang pinakamatanda sa BTS, ang unang miyembro ng grupo na nakatapos ng mandatory military service ng Korea. Si J-Hope naman ay nakatakdang matapos sa Oktubre. Ang iba pang miyembro na sina Jimin, Suga, Jungkook, RM, at V ay matatapos sa kalagitnaan ng 2025.
Isang araw pagkatapos ng kanyang discharge, lumahok si Jin sa isang fan event para sa ika-11 anibersaryo ng BTS, kung saan namigay siya ng libreng yakap sa mga masuwerteng fans na collectively tinatawag na Army.