Alam ni Sen. Bong Revilla Jr. ang kalagayan ng pelikulang Pilipino—mahina ang kita sa takilya, at karamihan ay hindi nababawi ang ginastos sa paggawa. Kulang din umano ang suporta ng gobyerno sa industriya, kaya naniniwala siyang kailangang magkaroon ng film commission na tutulong sa produksyon ng de-kalidad na pelikula.
Rebisahin ang Batas
Ayon kay Revilla, may mga hakbang naman ang gobyerno para tulungan ang industriya, kabilang na ang pagpasa ng Eddie Garcia Law, na naglalayong protektahan ang karapatan ng mga manggagawa sa pelikula at telebisyon.
“Pero may mga producer na nagsabing naapektuhan sila matapos maipasa ang batas,” ani Revilla. “Dapat talaga, maging mas mulat tayo sa tamang working hours ng mga nasa industriya. Kailangan nating pag-usapan muli ang batas, kasama ang producers at actors.”
Isa pang isyu ang pagkawala ng senior stars at child actors sa industriya. “Wala na halos child stars ngayon. Paano tayo makakalikha ng bagong Niño Muhlach kung limitado ang oras ng trabaho nila sa set? Kailangan natin itong pag-aralan ulit.”
Suporta ng Gobyerno
Ayon kay Revilla, dapat dagdagan ng gobyerno ang pondo para sa pelikula at telebisyon. “Ang dami naming senador na handang tumulong sa industriya. Kailangan nating ibangon ito dahil halos patay na. Lahat na lang nasa Netflix.”
Plano rin niyang bumuo ng batas para pababain ang presyo ng sinehan. “Ngayon, mahina ang P1,000 kung buong pamilya ang manonood. Hindi lahat kaya. Kaya mas pinipili ng iba ang streaming.”
Regulasyon sa Streaming
Bukod sa sinehan at TV, nais din niyang palawakin ang sakop ng MTRCB para ma-regulate ang pelikulang nasa streaming platforms.
Hindi Lang Budots
Matatandaang nag-viral ang “budots” dance ni Revilla noong 2019 campaign, pero giit niya, hindi lang iyon ang dahilan ng kanyang panalo. “Nagtrabaho ako. Ipinakita ko sa tao na hindi lang budots ‘yun.”
Habang papalapit ang eleksyon, aminado siyang hindi siya dapat maging kampante, lalo na’t bigating pangalan ang kanyang mga katunggali. Ngunit sa kabila ng kanyang kampanya, sinunod niya ang babala na huwag dumalo sa Panagbenga Festival para maiwasan ang batikos.
Para kay Bong Revilla, ang tunay na laban ay hindi lang sa pulitika kundi pati na rin sa pagbuhay ng pelikulang Pilipino.