Opisyal nang pumalit si Rep. Faustino “Bojie” Dy III ng Isabela (6th District) bilang bagong House Speaker ng ika-20 Kongreso matapos makakuha ng 253 boto mula sa mahigit 300 miyembro ng Kamara.
Idineklara ni Deputy Speaker Kristine Singson-Meehan ang pagkakahalal kay Dy, habang 28 ang nag-abstain at apat ang hindi bumoto.
Sa kanyang unang talumpati, inamin ni Dy ang bigat ng posisyon ngunit nangakong magdadala ng pagbabago. “Hindi ko ipagtatanggol ang may sala. Hindi ko poprotektahan ang tiwali,” ani Dy, na tiniyak ang suporta sa imbestigasyong isinasagawa ng ehekutibo kaugnay ng anomalya sa mga proyekto ng imprastraktura.
Binigyang-diin niya na hindi niya papayagan ang sinumang kongresista na gamitin ang pangalan ng Kamara para sa pansariling interes. Para sa mga mambabatas na nadawit sa isyu ng kickbacks at budget insertions, sinabi niyang may tamang forum upang magpaliwanag sila.
Si Dy ay dating vice governor ng Isabela (2019–2025) at kasalukuyang miyembro ng Partido Federal ng Pilipinas (PFP) ni Pangulong Ferdinand Marcos Jr. Muli siyang nahalal sa Kongreso noong 2025 bilang kapalit ng kanyang anak na si Echague Mayor Inno Dy V.
Nagbukas ng puwesto sa speakership matapos ang pagbibitiw ni Rep. Martin Romualdez (Leyte, 1st District) noong Setyembre 17, na sinalubong ng palakpakan at standing ovation mula sa mga kasamahan. Si Romualdez mismo ang nag-endoso kay Dy bago siya bumaba.
Sa botohan, sinuportahan si Dy maging ng ilang kritiko ni Romualdez gaya nina Rep. Duke Frasco, Rep. Albee Benitez, at Rep. Toby Tiangco, na dati’y nagdeklara bilang independent. Samantala, nanatiling abstain sina Rep. Kiko Barzaga, mga kinatawan ng Makabayan bloc, Akbayan, Mamamayang Liberal Party-list, at House Minority Leader Nonoy Libanan upang mapanatili ang kanilang pagiging bahagi ng minorya.
Bumaba si Romualdez sa gitna ng mga alegasyon ng katiwalian, partikular sa kontrobersyal na flood-control projects at mga insertion sa 2025 budget. Ayon kay Deputy Speaker Ronaldo Puno, matagal nang pinag-iisipan ni Romualdez ang pagbibitiw upang personal na harapin ang mga akusasyon.