Kahit namaalam na si Nora Aunor, buhay na buhay pa rin ang alaala niya — at malapit na itong mapanood sa big screen! Kinumpirma ng beteranong direktor na si Joel Lamangan na siya at Ricky Lee, Pambansang Alagad ng Sining para sa Pelikula at Brodkast, ay nagtutulungan para sa isang biopic tungkol sa buhay ni Nora.
Sa isang Facebook post noong Abril 19, ibinahagi ni Lamangan na nakausap na nila ang prodyuser at naghihintay na lang sila ng tamang panahon para simulan ang proyekto.
“Sayang, wala na si Ate Guy pero itutuloy namin ’yon!” ani Lamangan.
Matagal nang magkatrabaho sina Nora at Joel—ilan sa mga pelikulang pinagsamahan nila ay Muling Umawit ang Puso, Bakit May Kahapon Pa, Sidhi, Hustisya, Isa Pang Bahaghari, at ang critically acclaimed na The Flor Contemplacion Story, kung saan si Ricky Lee rin ang sumulat ng script. Dito ginampanan ni Nora ang papel ng isang OFW na binitay sa Singapore, at nanalo pa siya ng Best Actress sa Cairo International Film Festival.
Bukod sa pagiging aktres, kilala rin si Nora sa pagiging mapagbigay at malasakit sa kapwa. Ikinuwento ni Lamangan kung paanong nag-abot si Nora ng pera sa mga bilanggo matapos silang mag-shooting sa loob ng kulungan. May isa ring pagkakataon na nagbigay siya ng P15,000 sa isang magsasakang namatayan ng kalabaw—dahil naalala niya rito ang kanyang ama. Pakiusap pa raw ni Nora, huwag na lang itong ipaalam.
“Mabait si Ate Guy sa lahat ng ka-trabaho. Lalo na sa mga crew na maliit ang kita—hinding-hindi niya nakakalimutan bigyan ng tulong,” dagdag ni Lamangan.
Pumanaw si Nora Aunor noong Abril 16 sa edad na 71 dahil sa acute respiratory failure. Ayon sa anak niyang si Ian de Leon, naka-burol ang labi ni Nora para sa public viewing hanggang ngayong araw, at ihihimlay siya sa Libingan ng mga Bayani sa Abril 22.
Kahit wala na si Ate Guy, siguradong magpapatuloy ang ningning ng kanyang bituin sa pelikulang Pilipino.