Umani ng reaksiyon online ang pahayag ni Bianca Gonzalez tungkol sa mahal na biyahe sa mga lokal na tourist destination sa Pilipinas. Ibinahagi ng TV host ang isang tweet ng dating Comelec commissioner na si Gregorio Larrazabal na nagtatanong kung bakit mas mura pang bumiyahe sa ibang bansa kaysa sa loob ng Pilipinas.
Ayon kay Larrazabal, paano mahihikayat ang mga Pilipino na maglibot sa sariling bansa kung mas mababa ang pamasahe papuntang Hong Kong, Singapore, o iba pang ASEAN destinations kumpara sa ilang lokal na lugar. Nanawagan din siya ng mas murang airfare para sa mga destinasyong Pilipino.
Sang-ayon dito si Bianca matapos mapagtanto na mas mahal ang biyahe niya sa Siargao kaysa sa mga biyahe papuntang Bangkok, Hong Kong, at Vietnam. Aniya, mahirap suportahan ang lokal na turismo dahil sa taas ng gastos.
Batay sa presyo ng isang local airline, umaabot sa P8,000 hanggang P10,000 ang one-way ticket papuntang Siargao, o mahigit P18,000 para sa round trip. Samantala, ang biyahe mula Maynila papuntang Bangkok ay nasa P13,000 na round trip, may mga pagkakataon pang mas mababa.
Bukod pa sa pamasahe, kailangang isaalang-alang ng mga biyahero ang gastos sa hotel, transportasyon, pagkain, at environmental fees—na lalo pang nagpapamahal sa lokal na bakasyon.