Sa halip na pagdiwang, tensyon ang umalingawngaw sa kampo ng McLaren matapos magbanggaan sina Oscar Piastri at Lando Norris sa Singapore Grand Prix—isang insidenteng pumalit sa spotlight ng kanilang tagumpay bilang back-to-back Constructors’ World Champions.
Nagsimula ang gulo nang agresibong lumusot si Norris mula sa ika-limang pwesto, tinabig si Piastri sa unang likuan. Nagkaroon ng bahagyang banggaan, pero parehong nakatapos ang dalawang driver—si Norris sa ikatlo, at si Piastri sa ika-apat.
“Okay lang ba kay Lando na itulak lang ako?” reklamo ni Piastri sa team radio, habang mariing itinanggi ni Norris na siya’y masyadong agresibo. “Kung ‘di mo kayang pumasok sa malaking puwang, baka ‘di ka dapat nasa Formula One,” depensa ni Norris.
Bagama’t mainit ang tensyon, nagbaba ng tono si Piastri matapos ang karera at sinabing rerepasuhin muna niya ang mga replays bago magbigay ng pinal na opinyon.
Samantala, nanindigan si McLaren team principal Andrea Stella na mananatiling malaya ang dalawang driver na magkarerahan. “Let them race,” aniya. “Pareho silang mahusay, at gusto naming mapanatili ‘yon hanggang dulo ng season.”
Para kay McLaren CEO Zak Brown, ang insidente ay bahagi lang ng “matigas pero malinis” na karera. “Ganyan talaga kapag sabay sabay sa likuan. Nagpapaligsahan sila, pero marangal pa rin.”
Sa ngayon, hawak pa rin ni Piastri ang pangunguna sa drivers’ championship, ngunit nabawasan ito sa 22 puntos matapos ang laban sa Singapore. Habang papalapit ang pagtatapos ng season, tila hindi lang sa bilis magkakabanggaan ang McLaren duo—pati sa pride.